Skrímslið í bakpokanum

Þessa æfingu er hægt að gera með börnum sem finna fyrir erfiðum tilfinningum eða hugsunum. Þegar við erum til dæmis mjög kvíðin getum við upplifað kvíðann sem óþægilegan, uppáþrengjandi, erfiðan og stjórnandi. Þá er öflug leið að líta á hann sem lítið skrímsli. Okkur gengur nefnilega betur að að hafa áhrif á líðan ef okkur finnst við ekki föst í henni. Ef við sjáum erfiðu líðanina vera eitthvað sem er fyrir utan okkur (eins og ský sem kemur og fer) þá er oft auðveldara að ná utan um þessa erfiðu líðan og finna út úr henni.

Þetta litla ímyndaða skrímsli er ekki ógnandi heldur pirrandi. Til dæmis getur skrímslið táknað kvíða. Kvíðaskrímslið borðar áhyggjur og vex og dafnar á þessum áhyggjum og þegar kvíðinn stoppar okkur í að gera eitthvað. Skrímslið er oft með læti og vill mikla athygli.  Það vill að við höfum áhyggjur til þess að það vaxi og dafni - þegar við höfum áhyggjur fær það meiri kraft. Skrímslið vill líka reyna að segja hvað það er að meina með öllum þessum látum. Þetta skrímsli er nefnilega gert til að vara okkur við og segja okkur frá hættum. En vandamálið er að stundum er það að vara okkur við þegar það eru engar hættur. 

Gott er að kynnast þessu skrímsli betur og opna þannig á það sem barnið þitt er að upplifa og hjálpa því að skilja líðan sína. Ef barnið þitt reynir að forðast óþægilegar hugsanir og tilfinningar getur það leitt til togstreitu innra með barninu. Það fer jafnvel að vilja forðast alls konar aðstæður sem eru kannski stressandi en ekki hættulegar. Þá eykst kvíðinn og úr verður vítahringur. Þegar þú tekur eftir þessu hjá barninu þínu getur þú lesið eftirfarandi sögu fyrir það og reynt að komast að því hvað skrímslið í bakpokanum er að segja. Barnið getur teiknað mynd af skrímslinu eða skrifað hugsanir á blað og geymt í vasanum yfir dag.

Foreldrar geta svo einnig breytt sögunni eftir því sem hentar.