Hvernig á að hugleiða?

 

Rannsóknir sýna að hugleiðsla barna og unglinga eykur getu þeirra til að takast á við hversdagslífið.  Þau velja sér betri bjargráð, þróa síður með sér kvíða og streitu ásamt því að halda betur ró sinni þegar þess er þörf - standa betur með sér.

 

En það getur reynt á þolinmæðina þegar byrjað er að hugleiða - fyrir börn jafnt sem fullorðna.

 

Hér að neðan eru nokkur atriði og myndbönd sem geta hjálpað til:

 

  1. Það er eðlilegt að finna fyrir alls konar tilfinningum þegar við hugleiðum, hvort sem það er órói, pirringur, ró, slökun eða eitthvað annað.
  2. Ekki dæma þig ef þér finnst þetta ekki vera að ganga vel. Leyfðu þessu að vera innra ferðalag og bara skoða hverju þú tekur eftir.
  3. Núvitundarhugleiðsla er ekki það sama og slökun, þó að stundum finnur maður fyrir slökun við það að hugleiða.
  4. Gott er að byrja á stuttum æfingum og auka svo lengdina.
  5. Sumum finnst gott að hugleiða eftir hreyfingu - alla vega til að byrja með.
  6. Hægt er að hugleiða bæði standandi, liggjandi, sitjandi eða á hreyfingu.
  7. Ekki hafa áhyggjur af því þó hugurinn hoppi út og suður á meðan þú hugleiðir, það er eðlilegt.
  8. Það skiptir ekki máli hvenær dags þú hugleiðir – skoðaðu bara hvenær það hentar þér best.
  9. Settu raunhæf markmið um hve oft þú ætlar að hugleiða, það getur verið gott að ætla sér að hugleiða flesta daga frekar en að mistakast að hugleiða alla daga.
  10. Hugsaðu um hugleiðslu sem eitthvað sem verður hluti af lífi þínu til lengri tíma.

 

Til foreldra

  1. Best er að finna tilgang með hugleiðslunni og að hún sé ánægjuleg athöfn frekar en kvöð, bæði fyrir börn og foreldra.
  2. Áhrifaríkasta leiðin til að hvetja börn til að hugleiða er að vera góð fyrirmynd og að þau sjái að foreldrar hugleiði sjálfir.
  3. Mildi, forvitni, byrjendahugur, hlýja, umburðarlyndi og umhyggja eru mikilvægir þættir í núvitundarþjálfun. Leggðu þig fram um að mæta þér og barninu á þann máta.