Niðurrif- Hvað er það?
Stundum getur það gerst að vinur þinn eða þú sjálf/ur talið illa um líkama ykkar eða annarra. Þegar við tölum illa um útlit okkar eða annarra þá er það kallað “niðurrif”. [1]
Niðurrif þýðir að við rífum eitthvað niður, gerum lítið úr einhverju á oft ósanngjarnan hátt. Niðurrif getur stundum orðið ansi slæmt og ýkt. Þá er það sem sagt er ekki í tengslum við það sem í raun er rétt og satt.
Hér að neðan eru raunveruleg dæmi um svona niðurrif:
- Ég er ekki ánægð með magann minn - hann er ömurlegur og allt of mjúkur.
- Nei það er ekkert að maganum þínum en minn er hræðilegur!
- Nefið mitt er of stórt og ljótt.
- Ég vildi að ég væri með öðruvísi hár.
- Ég ætla að byrja í ræktinni og fá six-pack - ég er hallærislegur svona.
- Þetta er ekki sanngjarnt! Bróðir minn er miklu betur byggður en ég.
- Það sökkar að vera lágvaxinn, ég get ekki beðið eftir að verða hærri.
- Sjáðu hvað þessi er sæt (en ég ljót).
- Guð hvað maðurinn er feitur og ljótur.
- Augun á mér eru allt of lítil - og svo er of stutt bil á milli þeirra.
Veltið nú fyrir ykkur spurningunum hér að neðan:
Ertu með fleiri dæmi um útlitsniðurrif sem þú hefur sagt eða heyrt aðra segja?
Hver heldur þú að séu stærstu vandamálin sem fylgja niðurrifi?
Hvernig líður manneskju sem dettur í svona niðurrif? Hvernig líður hinum sem hlusta á það?
Hvernig líður þér þegar þú heyrir aðra tala illa um fólk og útlit þess?
Hvað getur þú sagt við sjálfa/n þig eða vini þína þegar niðurrif fer af stað? Gott er að velta þessu vel fyrir sér og taka sér tíma í að svara.
Gerðu samning við vini þína eða foreldra:
- Við ætlum ekki að tala illa um líkama okkar og útlit.
- Við ætlum að stoppa niðurrifstal annarra ef við getum. Við getum til dæmis notað hugmyndirnar sem koma úr svörunum hér að ofan til þess.
- [1] Unnið að hluta úr “Happy Being Me” - Susan Paxton. Birt með leyfi.